Social media trends die wel uutkomen binnen dit joar.
Leuke social media trends heur, mar ik heb der nog niks van weeromzien. Te vaak zien wi’j loze trends veurbi’jkommen. Beloften over gouden bargen die wi’j toch noit zien. De nijste social media app Clubhouse is hier n mooi veurbeeld van. Overal wordt der over proat of schreven en de hype was enorm. Toch heuren wi’j nou n joar loater hailemoal niks meer over de aituut zo veulbeloavende app. Mar welke trends leven wel op an de verwachtingen?
Social media trends van Hootsuite
De social media trends die wi’j metnemen in dit artikel kommen uut t ‘Hootsuite social trends 2022’ rapport. Elk joar brengt Hootsuite n social media trend rapport uut mit de vief grootste trends. Dit rapport wordt maakt op basis van de mening van verschillende specialisten. De social trend van 2022 binnen volgens Hootsuite de volgende:
De ‘brand strategy’ trend
De andacht van de consument is al n tiedje an t verschoeven van grote influencers noar klaine niche groepen die beter answuten bi’j heur interesses. De verwachting is dat marken meer goan warken mit disse klainere influencers die n niche gemeenschap opbouwd hebben.
De ‘social advertising’ trend
Marketeers goan meer geld uutgeven an t adverteren op social media. De uutdaging die hierbi’j komt kieken is dat n aandere manier van adverteren gewenst is. Mit n advertentie op social media deurbreek ie de scrollervoaring van de consument.
De ‘return on investment’ trend
Social media ontgroeit de marketingofdeling. t Vertrouwen van marketeers in t meten van de ROI van social media is ten opzichte van de veurige joaren ontzettend groeid. Ok worden der steeds meer maniern vunden um social media in te zetten veur aandere doeleinden. De verwachting is dat social media n grotere rol speulen giet in de hele organisoatie en niet meer allennig binnen de marketingofdeling.
De ‘social commerce’ trend
Online winkeln is an t veranderen. Woar t allemoal begunde mit webshops, is t al gauw deurgoan noar apps en tegenwoordig kun’n wi’j ok al winkeln op social media. De verwachting is dat winkeln via social media de nije standaard wordt.
De ‘customer care’ trend
Deur t gebrek an personeel overal ter wereld hebben veul bedrieven te maken mit langere levertieden. Disse ontwikkeling zörgt gegarandeerd veur meer klanten die niet zo tevreden binnen. Ondertussen wordt der steeds meer gebruuk maakt van social media um klachten deur te geven. Veur de social marketeer de perfecte uutdaging um t bedrief deur de klachtenstroom hen te trekken.
Zo op t eerste gezicht binnen dit trends woar ik achter sta. Mar nou wi’j ondertussen al zeuven moanden verder binnen blikt toch dat niet alle trends uut dit rapport opleven an de verwachtingen. Wi’j goan ze samen ain veur ain bi’j langes.
De ‘brand strategy’ trend
Tiedens de pandemie ontstonden der steeds meer online ‘communities’. De bepoalde groepen bestoan uut mensen die deselfde interesses hebben. Ie kun’n joe veurstellen dat dit n mooie kans is veur ondernemers. Vind n groep die vol zit mit potentiële klanten en goa an de sloag. De vroag is allennig hou ie in disse groepen terecht kommen. Volgens de trendwatchers van Hootsuite zol dit via de creators binnen de groep mouten.
Hadden ze geliek? Ja. Steeds meer bedrieven investeren in samenwarkingen mit de zogenaamde creators. Zo zie ie bi’jveurbeeld grote marken miljoenen oftikken um in n kotte TikTok veur te kommen. Of klainere bedrieven die n samenwarking angoan mit n klaine influencer die toarten bakt um bi’jveurbeeld heur nije toartschep an te prieze. t Veurdail van disse samenwarkingen is dat ie zeker weten dat ie n bepoald bereik creëren. De groepen rondum disse creators of influencers binnen vaak arg loyaal en kieken vri’jwel alle content die de persoon in kwestie noar buten brengt.
Hou giet dit der in de toukomst uutzien? De belangriekste vroag die wi’j beantwoorden mouten um der achter te kommen of disse trend deurgiet in de noabi’je toukomst is: ”Is t meugelk veur klainere creators um hier heur brood mit te verdainen?”. De wereld rondum influencers is vri’j nij en de maniern um geld te verdainen binnen nog vri’j beparkt. Momenteel komt al t geld in t loadje deur middel van betoalde samenwarkingen. Dus wat gebeurt der wanneer bedrieven minder geld over hebben veur disse manier van adverteren? Blieven de klainere influencers dan wel bestoan? Leuk um in de goaten te holden.
De ‘social advertising’ trend
Wi’j as consument kriegen steeds beter deur wanneer n bedrief reclame deur ons content hen perbeert te gooien. Wi’j binnen lekker an t scrollen deur Instagram en opains zie ie n totoal niet subtiele advertentie. Dit verpest joen ervoaring en zörgt derveur dat ie zo gauw meugelk veurbi’j de advertentie scrollen. Dat is ok niet ideoaal veur de adverteerder. Dit zörgt derveur dat marketeers steeds creatiever worden mouten um te zörgen dat de advertentie answut bi’j de content die de consument verwacht. Mar hou giet hen disse of?
Kanoalen as Instagram en TikTok zörgen derveur dat t bedrieven minder geld kost um effectief te adverteren en marketeers maken hier gretig gebruuk van. De kösten van t plaotsen van n advertentie binnen niet noar beneden goan mar de gewenste content is n stuk makkelker te maken. Deur bi’jveurbeeld in te haken op n relevante TikTok trend woarin ie joen product slim verwarken weten kom ie as adverteerder al n hele aind. t Voult as organische content en consumenten zullen hier minder gauw veurbi’j scrollen. Toch binnen der nog genogt bedrieven die t niet hailemoal onder de knie kriegen en op de olde manier deurgoan. Giet dit in de toukomst nog veranderen?
De kans dat advertentiebudgetten krapper blieven worden is vri’j groot. Doarom is t ontzettend belangriek veur bedrieven um meer creativiteit in de advertenties te stoppen. TikTok en Instagram perbeern joe hierbi’j te helpen deur t makkelker te maken um in te haken op bepoalde trends die op dat moment goande binnen. Ain van de problemen woar wi’j wel tegen an lopen kun’n is dat t muilker wordt um joe te onderschaiden as bedrief. Wanneer elkenain inzet op de nije manier van adverteren op social media, zal der weinig roemte wezen um uniek te blieven. N leuke uutdaging veur de creatieve marketeer.
P.S. Loat wi’j niet vergeten dat t verplicht blift um in joen content an te geven wanneer t giet um n gesponsorde deal.
De ‘return on investment’ trend
Social media het in de leste joaren n gigantische groei deurmaakt binnen de bedriefscultuur. Woar t allemoal begunde as n toak die eventies oppakt wordt deur de telefoniste wordt t al gauw n toak veur de marketingofdeling. Tegenwoordig hebben veul grotere bedrieven aparte social marketeers en contentmarketeers zitten speciaal veur de social media accounts. En t geleuf is dat dit allennig nog mar verder uutbreiden zal. t Is n kwestie van tied veurdat social media inzet wordt um t hele bedrief te helpen mit uteenlopende doelstellingen. Tenminste, dat is de verwachting. Hou giet dit tot nou toe?
t Idee dat social media wieder inzet worden giet op kotte termien komt veural vanuut marketeers die dagelks bezig binnen mit social media. Disse marketeers zien de woardevolle informoatie die veurtkomt vanuut de dagelkse interactie en zien dus ok t effect wat t hebben kan op de hele organisoatie. Mar, wi’j zien t nog niet echt gebeuren. Directies en aandere ofdelingen binnen nog niet gek van t idee dat social media veur heur belangrieke inzichten opleveren kan. Op de kotte termien is dit n trend woar niet veul progressie in zitten zal, mar wellicht is dit op de langere termien wel aanders.
Wat n leuke vroag is veur de kommende tied is welke ofdelingen concreet wat hebben kun’n an social media. De uutdaging veur marketeers is hier t overtugen van de aandere ofdelingen deur concrete inzichten an te leveren. Wat kan social media betaikenen? En hou goan wi’j dat in koart brengen?
De ‘social commerce’ trend
Tiedens de pandemie was der n grote hype rondum t aind van de fysieke winkel. Regelmoatig kwam der wat veurbi’j over t gevoar van online shoppen en hou dit de fysieke winkel overbodig maken zol. Nou wi’j uutindelk uut de pandemie binnen (even ofkloppen) blikt t tegendail woar. Consumenten binnen krek blied dat ze weer noar de fysieke winkels meugen. t Online shoppen het wel veur n antal mooie ontwikkelingen zörgd. Woaronder social commerce, ofwel winkeln via social media. Hou staat t der nou veur mit social commerce?
Wi’j binnen nog niet zo ver as verwacht. De verwachting was dat social commerce de grootste nije ontwikkeling wezen zol binnen online shoppen. Mar wat wi’j in de praktiek zien is dat dit nog niet t geval is. Momenteel wordt social media zeker wel gebruukt tiedens t shoppen, mar dan meer um te oriënteren en as zeukmesjien. Zo wordt social commerce wel gebruukt mar is t nog niet woar wi’j verwacht hadden. Giet dit in de toukomst wel gebeuren?
Wi’j zien dat social media momenteel vaker gebruukt wordt um marken te ontdekken as de reguliere manier van zeuken via Google. Dit is veural onder jongere mensen t geval. Doarnoast zien wi’j dat verschillende social media kanoalen druk bezig binnen mit t uutrollen van verschillende updates gericht op social commerce. Zo het TikTok n tiedje leden de live shopping functie geïntroduceerd woarbi’j mensen vanuut n livestream woar n bepoald product toond wordt, direct over goan kun’n tot ankoop. t Grootste probleem woar consumenten nou nog tegen an lopen is t gebrek an vertrouwen in t ankoopproces. En dit zörgt der dailels veur dat social commerce nog niet zo groot is as t hadden kun’n wezen.
De ‘customer care’ trend
Wi’j worden der allemoal aigelk wel deur beïnvloed, t gebrek an personeel en de problemen mit levertieden. Producten die twij joar leden nog de volgende dag op joen deurmat stonden doun der tegenwoordig langer over. De veurspelling was dat dit laidt tot n flinke toenoame in klachten en vroagen veur de klantenservice. Dit komt tegelieketied mit de behoefte an klantenservice via social media. N ideoale kans veur de social marketeer um zuk te onderschaiden en t bedrief flink te helpen zol ie zeggen. Mar is dit ok daadwarkelk gebeurd?
Wat zeker gebeurd is is de toenoame van klachten en vroagen. Wat in mindere moate gebeurt is t binnenkommen van die klachten via social media. Veul mensen goan nog noar de website um doar via t contactformulier of t telefoonnummer heur beklag te doun. Onder de jongeren zien wi’j wel n toenoame in t antal klachten wat binnenkomt via social media. De drempel is veur disse generoatie netuurlek ok n stuk lager wanneer t via social media kan. Zoas wi’j allemoal wel weten is der bi’j de jongste generoaties sproake van n zekere ongeduld. Dit zörgt derveur dat de klachten dus verschoeven noar social media. Tegelieketied zörgt dit derveur dat de social marketeer de klachten wel oplossen mout umdat niet altied elkenain toegang het tot t account. Ik verwacht dat wi’j in de toukomst veul meer te maken kriegen mit klachten en vroagen via social media. Mar hou zit dat mit de experts?
De experts van Hootsuite denken dat de social media manager n uutebreider toakenpakket kriegt. Dit zörgt der ok direct veur dat de social media manager meer inspraak kriegt binnen t bedrief. Wel meer verantwoordelkhaid op zuk nemt het ok meer te zeggen. Verder wordt der deurlopend warkt an t verbeteren van geautomatiseerde chats. Dit zörgt derveur dat der meer chatbots op de mark kommen en dus de pries ok omloag giet. Doarom is de verwachting dat meer bedrieven geautomatiseerde chatbots gebruuken goan um veul veurkommende klachten op te lossen. Weerans interessant um disse ontwikkelingen in de goaten te holden.
Echte social media trends
Zo zie ie mar dat niet alle trendrapporten onzin binnen. Wanneer ie genogt muite doun in t vergoaren van relevante informoatie van relevante mensen dan wordt t makkelker um specifieke social media trends vast te stellen. Zo binnen der bi’j dit rapport ruum 18.000 respondenten west, meer as 15 expertinterviews en is der warkt mit data uut meer as 200 landen. En dat zörgt veur betrouwboare trends. Mar ok wanneer ie der veur zörgen dat ie alle data hebben die ie neudig hebben kun’n, kun ie nog altied niet de toukomst veurspellen. Of zullen wi’j t toch even perbeeren? Welke social media trends veurzie ie in de toukomst?