Hou krieg ik mien vacatures vuld?
Bedrieven hebben steeds meer muite um de juuste medewarkers te vinden. Dit het niet allennig te maken mit t overschot an vacatures mar ok mit de kwaliteit van disse vacatures. Steeds vaker zien wi’j online vacatures langeskommen die der um de verkeerde reden tussenuut springen.
Volgens cijfer van t UWV binnen der in Drenthe ongeveer 3.200 online vacatures, en ongeveer 18.000 registreerde warkzuikers. In eerste instantie zol ie denken dat der genogt mensen binnen um alle vacatures te vullen. Mar as ie dan bedenken dat meer as 12.000 van disse warkzuikers momenteel al n aander boane hebben, en der tussen de aander 6.000 mar n poar zitten die answuten bi’j joen profiel. Dan wordt t vinden van n geschikte kandidoat al n hail stuk lastiger.
10 tips
Um derveur te zörgen dat ie mit joen vacatures de beste kandidoaten weten te vinden, hebben wi’j n antal tips op n riegel zet.
1. Zörg veur n compleet en correct functieprofiel
Zörg derveur dat ie eerst zölf duudelk hebben welke warkzaamheden joen nije collega daadwarkelk uutvoeren giet. Stel n functieprofiel op en vat disse samen in de vacature. Wees duudelk over wat ie verwachten van joen nije collega. Stel doarbi’j niet te veul aisen. Vaak vroagen wi’j um n duzendpoot, wat mensen ofschrikt.
2. Maak de functietittel begriepelk
Zörg dat elkenain direct begript wat de functietittel betaikent. Vroag joezölf of welke zeukwoorden gebruukt worden um joen vacature te vinden. Perbeer niet te overdrieven in t creatieve, n tittel mout duudelk wezen en direct inzicht geven in de vacature. N goeie functietittel zörgt derveur dat warkzuikers deurklikken.
3. Stap ais of van de opsommingen
Vacatures worden steeds meer ontzettend lange liestjes mit opsommingen. Perbeer wat nijs en kiek of ie de warkzaamheden in n leuk verhoal nerzetten kun’n. Omschrief n typische warkdag van joen anstoande collega. Perbeer de teksten wat persoonlker te maken deur zinnen te gebruuken as: ‘Ie voulen joe as n vis in t woater wanneer…’ of ‘Mit joen talent veur verkoop goa ie…’.
4. ”What’s in it for me?”
Focus eerst op wat ie te beeden hebben. Wat binnen de veurdailen veur de warkzuiker um te reageren? Wark doarnoa pas uut wat ie allemoal vroagen van de warkzuiker. N sollicitant wil best uutdaagd worden, mar t mout niet zo wezen dat der niks anbeeden wordt deur t bedrief. Wanneer mensen eerst de veurdailen van n vacature zien worden ze triggerd um verder te lezen en te reageren.
5. Check joen vacatures op sites as Indeed
Op Indeed giet t nog wel ais mis umdat de teksten vaak rechtstreeks overnomen worden. Check joen vacatures online en zörg derveur dat allns precies zo staat as ie t willen. Wanneer dit niet t geval is zullen warkzuikers niet klikken op joen vacature. En dan lope ie meschien zomaar de perfecte kandidoat mis.
6. Stem joen landingspagina’s of
Wanneer joen vacature linkt noar n webpagina, zörg der dan veur dat disse pagina daadwarkelk answut bi’j de vacature. Geef hier bi’jveurbeeld extra informoatie, gebruuk antrekkelke ofbeeldingen en vergeet de call-to-actionknoppen niet. Help de sollicitant in de juuste richting mit n duudelke landingspagina.
7. Promoot joen vacatures
Super, nou heb ie n goeie vacaturetekst schreven. De volgende uutdaging staat alweer kloar: vunden worden. Promoot joen vacatures via social media. Op disse manier kun ie rechtstreeks joen doelgroep bereiken. Niet hail bekend mit promotie op social media? Nem dan contact mit ons op. Wi’j helpen joe geern verder.
8. Vroag hulp an collega’s
Collega’s binnen t ideoale uuthangbord van joen bedrief. Vroag an joen collega’s um de vacature online te delen. En vroag of ze der veur open stoan um n klaine impressie te geven van hou zi’j de sfeer ervoaren binnen t bedrief. Dit zörgt veur n betrouwboare uutstroaling.
9. Reageer!
Wanneer de reacties op joen vacature binnenstromen is t belangriek um te reageren op elkenain. Loat t ok weten wanneer en woarom iemand t niet worden is. Blief altied professioneel en vriendelk tegen sollicitanten, wel weet of ie ze in de toukomst weer tegenkommen.
10. Maak indruk
Draai t bi’j t gesprek nou ais um. Perbeer indruk te maken op joen sollicitant in ploatse van aandersum. Op disse manier hoal ie de perfecte kandidoat binnen. Loat n blievende indruk achter.
t Schrieven van n winnende vacature is niet altied even makkelk en der giet nogal wat tied in zitten. Wi’j snappen dat niet elkenain t talent of de tied het veur t schrieven van pakkende teksten. Doarom willen wi’j geern helpen. Ons webbazen verdiepen zuk in t schrieven van pakkende teksten die online goud scoren. Binnen ie benijd noar de meugelkheden? Nem dan vrieblievend contact mit ons op, en wel weet kun’n wi’j wat veur joe betaikenen.